die internatzionale de sa limba nadia, 21/2/2007

Messàgiu de su Diretore de s'Unesco, Koichiro Matsuura, pro sa Die Internatzionale de sa limba nadia

Sa limba nadia est pro cadaunu de nois unu tesoro. Est cun issa chi naramus sas primas paràulas pro fàghere cumprèndere sos pessamentos nostros. Dae su primu mamentu de s'esistèntzia nostra, sa limba nadia marcat sa personalidade nostra e sas fundamentas, chi l'ant a sustènnere pro totu sa bida, dende rispetu a sos sentimentos nostros, a s'istòria e a sa cultura nostra. Sos ispetzialistas lu ischint bene: sas limbas non sunt sistemmas semper aguales e serrados, ma sunt su resurtadu de cuncàmbios e influèntzias in su tempus difatis non b'at limbas sena istòria. Sa limba nostra est fata dae prèstidos in ue b'at sa mistura de identidade e alteridade. S'identidade est su frutu de sa diversidade e de sa cumplementariedade. Sa limba devet èssere comunicatzione in sas famìlias, in s'iscola, in sa crèsia, in sa polìtica, in sos giornales, in totu sos àmbitos de sa bida sotziale. S'UNESCO s'impinnat a promòvere su plurilinguismu in s'iscola pro su reconnoschimentu e s'impreu de a su nessi tres livellos: limba nadia, limba natzionale e limba de comunicatzione. Sa promotzione de sa diversidade linguìstica e culturale est in favore de su diàlogu intre sos pòpulos, sas culturas e sas tzivildades. Diversidade e diàlogu, identidade e alteridade sunt in pràtica sos pilastros de una funtzionalidade cumplementare chi su plurilinguismu devet fàghere intre de issu mediante unu sistema coerente intre sas limbas regionales e natzionales. Su plurilinguismu, mancari sos progetos, est petzi unu ideale e nono una realidade. Prus de sas 6000 limbas chi esistint in su mundu arriscant de iscumpàrrere. S'Africa est su paradigma de custu: unu tertzu de sas limbas de su mundu sunt faeddadas in ie e mancari sa popolatzione las impreet cada die, custas limbas non sunt presentes in s'amministratzione pùbblica, in sos tribunales. S'Unione Africana s'impinnat a realizare unu progetu de ordinatzione linguìstica pro dare benefìtziu a sa chistione de sa limba. Custa istrategia, lontana dae cale si siat idea identitària ebbia de sas limbas, est su chi cumbenit a pònnere in pràtica, pro abbaidare a su tempus benidore cun s'isperu de unu mundu plurilingue , in ue sos òmines podant èssere frades de a beru.